گاڑی کے ٹائروں پر لکھے مخصوص ’نمبروں‘ کا مطلب کیا ہے؟ اہم معلومات

مشہور محاورہ ہے کہ ’چلتی کا نام گاڑی‘ لیکن کسی بھی گاڑی کے چلنے کیلئے ٹائروں کا ہونا ضروری ہے، گاڑی کے ٹائر جتنے پائیدار اور مضبوط ہوں گے گاڑی اتنی ہی دور تک چلتی چلی جائے گی۔

اگر ’ٹائر‘ نہ ہوں تو کوئی گاڑی چلانے کا تصور بھی نہیں کرسکتا۔ اس سے آپ اندازہ لگا سکتے ہیں کہ ٹائر کتنی اہم چیز ہے اور یقیناً اتنی اہم چیز کا بہت زیادہ خیال رکھنا بھی ضروری ہے۔

زیر نظر مضمون میں گاڑی کے ٹائروں کے حوالے سے اہم معلومات فراہم کی جارہی ہیں جسے پڑھ کر آپ کے علم میں یقیناً اضافہ ہوگا اور آپ کی گاڑی بھی بہت دیر تک آ پ کا ساتھ دے گی۔

جیسا کہ سب جانتے ہیں کہ ہر ٹائر کی رفتار کی ایک حد ہوتی ہے اور اس کی ایک مدتِ معیاد بھی ہوتی ہے جو اس پر لکھی ہوتی ہے۔ یہ معلومات ٹائر کے سائیڈ پر درج ہوتی ہے۔

لیکن اس کی معلومات ایک خاص انداز اور کُلیے کے تحت مخصوص نمبروں میں درج ہوتی ہے جسے سمجھنے کیلئے ان نمبروں کے اشارے سمجھنا ضروری ہیں۔

مثال کے طور پر اگر آپ کو ٹائر پر "1423” لکھا ہوا نظر آئے تو اس کا مطلب ہے کہ یہ ٹائر سال 2023کے چودھویں ہفتے میں بنایا گیا ہے۔

ویسے تو ایک عام ٹائر کے چلنے کی معیاد عام طور پر 2 سے 4 سال تک ہوتی ہے، اس کے بعد اسے تبدیل کر دینا چاہیے۔

اسی طرح ہر ٹائر کی رفتار کی ایک حد ہوتی ہے جو اس پر درج ایک حرف سے ظاہر ہوتی ہے،

حرف "L” کا مطلب ہے کہ ٹائر کی زیادہ سے زیادہ رفتار 120 کلومیٹر فی گھنٹہ ہے۔
حرف "M” کا مطلب ہے 130 کلومیٹر فی گھنٹہ۔
حرف "N” کا مطلب ہے 140 کلومیٹر فی گھنٹہ۔
حرف "P” کا مطلب ہے 150 کلومیٹر فی گھنٹہ۔
حرف "Q” کا مطلب ہے 160 کلومیٹر فی گھنٹہ۔
حرف "R” کا مطلب ہے 170 کلومیٹر فی گھنٹہ۔
اور حرف "H” کا مطلب ہے کہ ٹائر 210 کلومیٹر فی گھنٹہ سے زیادہ رفتار برداشت کر سکتا ہے۔
یہی وجہ ہے کہ اکثر ٹائر تیز رفتاری کے دوران پھٹ جاتے ہیں کیونکہ وہ مقررہ رفتار سے زیادہ دباؤ برداشت نہیں کر سکتے۔

لہٰذا، ہمیشہ ٹائر خریدتے ہوئے پر اس پر درج حرف یا نمبرز لازمی چیک کریں اور رفتار کا خیال رکھیں تاکہ آپ حادثے سے بمحفوظ رہ سکیں۔

اس کے علاوہ عموماً آپ ٹائر کے اوپر اس طرح کے نمبر درج دیکھیں گے: 195 65 R 15 91 H ان کی تفصیل کچھ یوں ہے۔

195: اس کا مطلب ہے کہ ٹائر کی چوڑائی 195 ملی میٹر ہے۔
65: یہ چوڑائی اور اونچائی کے تناسب کو ظاہر کرنے والا نمبر ہے، یعنی اونچائی چوڑائی کا 65 فیصد ہے۔

R: اس کا مطلب ریڈئیل (Radial) ہے۔
15: یہ وہیل کا قطر ہے، یعنی جو ٹائر آپ دیکھ رہے ہیں وہ 15 انچ قطر کے وہیل پر فٹ ہوگا۔
91: یہ نمبر لوڈ انڈیکس کہلاتا ہے، لوڈ انڈیکس 91 کا مطلب ہے کہ یہ ٹائر 615 کلوگرام تک وزن اٹھاسکتا ہے۔

H: یہ حرف رفتار کو ظاہر کرتا ہے۔ جتنا بڑا حرف ہوگا ٹائر اتنی زیادہ رفتار برداشت کرسکتا ہے۔ حرف H والے ٹائر کیلئے 210 کلومیٹر فی گھنٹے تک کی رفتار محفوظ رفتار ہے۔