عامر جمال کی اننگز رائیگاں، یونائیٹڈ نے زلمی کو شکست دے دی
پی ایس ایل 9 کے 20ویں میچ میں اسلام آباد یونائیٹڈ نے پشاور زلمی کو 29 رنز سے شکست دے دی۔ راولپنڈی اسٹیڈیم میں کھیلے گئے میچ میں اسلام آباد یونائیٹڈ کی جانب سے دیے گئے 197 رنز کے تعاقب میں پشاور زلمی کی ٹیم 9 وکٹوں کے نقصان پر 167 رنز بناسکی۔ عامر جمال […]
پی ایس ایل 9 کے 20ویں میچ میں اسلام آباد یونائیٹڈ نے پشاور زلمی کو 29 رنز سے شکست دے دی۔
راولپنڈی اسٹیڈیم میں کھیلے گئے میچ میں اسلام آباد یونائیٹڈ کی جانب سے دیے گئے 197 رنز کے تعاقب میں پشاور زلمی کی ٹیم 9 وکٹوں کے نقصان پر 167 رنز بناسکی۔
عامر جمال کی 87 رنز کی شاندار اننگ بھی زلمی کو شکست سے نہ بچاسکی۔
پال واکر 33 رنز کے ساتھ نمایاں رہے، ٹام کوہلر کیڈ مور 12 رنز بنا کر آؤٹ ہوئے جبکہ ابتدا میں زلمی کے 18 رنز پر پانچ کھلاڑی پویلین لوٹ گئے تھے۔
صائم ایوب 1، کپتان بابر اعظم بغیر کوئی رن بنائے آؤٹ ہوئے، محمد حارث بھی ایک رن کے مہمان ثابت ہوئے۔
اسلام آباد یونائیٹڈ کے کپتان شاداب خان نے تین وکٹیں حاصل کیں، رومان رئیس اور حنین شاہ نے بھی دو، دو وکٹیں حاصل کیں۔
اسلام آباد یونائیٹڈ نے مقررہ اوورز میں 4 وکٹوں کے نقصان پر 196 رنز بنائے اور پشاور زلمی کو جیت کے لیے 197 رنز کا ہدف دیا تھا۔
کپتان شاداب خان نے 80 رنز کی دلکش اننگز کھیلی، آغا سلمان 37 رنز بنا کر نمایاں رہے، الیکس ہیلز بغیر کوئی رن بنائے پویلین لوٹ گئے۔
کولن منرو 15 رنز بنا کر صائم ایوب کو وکٹ دے بیٹھے، جارڈن کاکس 26 رنز بنا کر ناٹ آؤٹ رہے، اعظم خان نے 14 گیندوں پر 29 رنز بنائے۔
پشاور زلمی کی جانب سے صائم ایوب نے دو اور لک ووڈ نے ایک وکٹ حاصل کی۔
پشاور زلمی کے کپتان بابر اعظم نے ٹاس جیت کر شاداب خان الیون کو پہلے بیٹنگ کی دعوت دی تھی۔
پوائنٹس ٹیبل پر پشاور زلمی کی تیسری اور اسلام آباد یونائیٹڈ کی چوتھی پوزیشن ہے۔
پہلے مرحلے میں پشاور نے اسلام آباد کو 8 رن سے ہرایا تھا، ہیڈ ٹو ہیڈ مقابلوں میں پشاور نے 22 میں سے 12 میچ جیتے ہیں۔
آپ کا ردعمل کیا ہے؟
