سلمان خان کے پرستار کو مذاق کرنا مہنگا پڑ گیا

بالی ووڈ اسٹار سلمان خان اپنے گھر پر فائرنگ کے بعد سے مسلسل خبروں میں ہیں اب ان کے ایک پرستار کو مذاق اتنا مہنگا پڑا کہ وہ سلاخوں کے پیچھے پہنچ گیا۔

انڈین میڈیا کے مطابق باندرہ پولیس نے سلمان خان کے گھر فائرنگ کرانے کے کیس میں مطلوب ملزم گینگسٹر لارنس بشنوئی کے نام سے بالی ووڈ سپر اسٹار کی رہائش گاہ سے ٹیکسی بک کروانے پر ایک 20 سالہ نوجوان کو گرفتار کیا ہے۔

ممبئی پولیس کا کہنا ہے ملزم کی شناخت غازی آباد، اتر پردیش کے رہنے والے 20 سالہ نوجوان روہت تیاگی کے طور پر کی گئی ہے، جس نے لارنس بشنوئی کے نام پر اداکار سلمان خان کے گھر گلیکسی اپارٹمنٹ سے باندرہ پولیس اسٹیشن تک کیب بُک کرائی تھی۔

پولیس کے مطابق جب کیب ڈرائیور سلمان خان کے گھر گلیکسی اپارٹمنٹ پہنچا اور وہاں موجود چوکیدار سے بکنگ کے بارے میں پوچھا تو چوکیدار پہلے تو حیران اور پریشان ہوا پھر اس نے فوری طور پر قریبی باندرہ پولیس اسٹیشن کو بکنگ کی اطلاع دی اور پولیس نے کیب ڈرائیور سے پوچھ گچھ کر کے آن لائن کیب بُک کرنے والے شخص کے بارے میں معلومات حاصل کیں۔

پولیس نے کہا جس شخص نے کیب بک کی تھی وہ غازی آباد کا رہنے والا 20 سالہ طالب علم نکلا، جس نے مذاق کے طور پر گینگسٹر لارنس بشنوئی کے نام پر ٹیکسی بُک کروائی تھی۔

پولیس نے ملزم غازی آباد اتر پردیش سے گرفتار کر کے مقدمہ درج کر لیا اور ممبئی کی عدالت نے اسے مزید تفتیش کے لیے باندرہ پولیس کے حوالے کر دیا ہے۔

دوسری جانب ممبئی کرائم برانچ نے سلمان خان کے گھر پر فائرنگ کے الزام میں گرفتار دو ملزمان وکی گپنا اور ساگر پال کو کرائم برانچ کی تحویل میں دے دیا ہے۔

سلمان خان کے گھر فائرنگ کیس میں اب تک کی سب سے بڑی پیش رفت

واضح رہے کہ 14 اپریل کو ممبئی کے معروف علاقے باندرہ میں اداکار سلمان خان کی رہائشگاہ گلیکسی اپارٹمنٹس کے باہر موٹر سائیکل سوار دو افراد نے فائرنگ کی تھی جنہیں گرفتار کر لیا گیا تھا جب کہ پولیس اس کیس میں جیل میں قید گینگسٹر لارنس بشنوئی اور اس کے بھائی کو مطلوب ملزم قرار دے چکی ہے۔