سابق آسٹریلوی کرکٹر نے اعظم خان کو ’نایاب کھلاڑی‘ قرار دے دیا

سابق آسٹریلوی کرکٹر ٹام موڈی نے وکٹ کیپر اعظم خان کو ’نایاب کھلاڑی‘ قرار دے دیا۔

آسٹریلیا کے سابق کرکٹر ٹام موڈی آئی ایل ٹی 20 میں ڈیزرٹ وائپرز کے لیے کرکٹ کے ڈائریکٹر کے طور پر خدمات انجام دے رہے ہیں، انہوں نے قومی کرکٹر اعظم خان کی کارکردگی کی تعریف کی ہے۔

اعظم خان آئی ایل ٹی 20 کے رواں سیزن میں ہم وطن فخر زمان اور محمد عامر کے ساتھ ڈیزرٹ وائپرز کے اسکواڈ کا حصہ ہیں۔

ایک انٹرویو میں موڈی نے کہا کہ اعظم خان اس سیزن میں ڈیزرٹ وائپرز کے لیے حقیققی اثاثہ ثابت ہوں گے، ہم سب جانتے ہیں وہ کیا کرنے کی صلاحیت رکھتے ہیں، وہ ان نایاب کھلاڑیوں میں سے ایک ہے جو پہلی گیند سے گیند کو گراؤنڈ سے باہر مار سکتا ہے۔

انہوں نے کہا کہ کھیل کے اس فارمیٹ میں اس طرح کے کھلاڑیوں کا ہونا حقیقی بونس ہے، مجھے یقین ہے وہ ہمارے لیے بہترین ثابت ہوں گے۔

ٹام موڈی نے محمد عامر کی بھی تعریف کی اور کہا کہ عامر ایک شاندار بولر ہے وہ پچھلے سال ہمارے ساتھ تھا اور ہم اس کی قابلیت سے باخوبی واقف ہیں۔

واضح رہے کہ گزشتہ سیزن میں ڈیزرٹ وائپرز کے لیے عامر نے 9 میچوں میں 21.08 کی اوسط کے ساتھ 12 وکٹیں حاصل کی تھیں جبکہ اعظم خان نے سات اننگز میں 31.80 کی اوسط سے 159 رنز بنائے اور ان کا اسٹرائیک ریٹ 176.66 تھا۔