دو سالہ بچہ گھر سے نکلتے ہی کتوں کا شکار بن گیا!

پڑوسی کے کتوں نے دو سالہ بچے پر حملہ کرکے اسے مار ڈالا، پولیس نے بتایا کہ یہ واقعہ گزشتہ ہفتے پیش آیا۔

امریکی ریاست الاباما میں نہایت افسوسناک واقعہ رونما ہوا ہے، میڈیسن کاؤنٹی شیرف کے دفتر کے مطابق، بچے کی شناخت 2 سالہ مارک ایلن پارٹین کے نام سے ہوئی ہے، گزشتہ جمعہ کو ممکنہ طور پر تین کتوں نے بچے پر حملہ کیا۔

پولیس نے بتایا کہ چھوٹا بچہ اپنے گھر سے گیٹ کھول کر پڑوسی کے گھر گیا جہاں اس نے دو کتے رکھے ہوئے تھے۔ پڑوسی رکی کلارک کا کہنا تھا کہ اس نے گیٹ کھلا دیکھا اور پھر مارک کو کتے کے پنجرے کے سامنے بے حس و حرکت پایا۔

میڈیا کو کلارک نے بتایا کہ بچہ وہاں کتے کے پنجرے کے سامنے زمین پر بے سدھ پڑا تھا اور وہ حرکت نہیں کر رہا تھا۔

پڑوس کا کہنا تھا کہ اس کے کتوں ہسکی اور جرمن شیفرڈ نے اس سے پہلے کبھی کسی پر حملہ نہیں کیا یا کسی کو زخمی نہیں کیا تھا۔

مارک کی ماں، کیلا ہیوگے پارٹین نے اپنی فیس بک پر پوسٹ میں کہا کہ اس ’’انتہائی المناک حادثے‘‘ کے لیے کسی کو مورد الزام نہیں ٹھہراؤں گی۔

انھوں نے کہا کہ مجھے یہ بھی نہیں لگتا کہ میں حقیقت میں زندہ ہوں۔ میرے بچوں کے دل بہت زیادہ ٹوٹے ہوئے ہیں۔ ہر اس شخص کا شکریہ جسں نے میسج کیا، دعا کی، یا دلاسے کا پیغام بھیجا۔

پڑوسی کلارک نے کہا کہ ہوسکتا ہے کہ اس کے کتے مارک کو پڑوس میں گھومنے والے بھورے بُلڈاگ سے بچانے کی کوشش کر رہے ہوں۔

دونوں کتوں کو اینیمل کنٹرول کے حوالے کردیا گیا ہے تام امید ہے کہ چند ہفتوں میں انھیں واپس کر دیا جائے گا۔ دریں اثنا مذکورہ خاندان کی مدد کے لیے ایک فنڈ بھی قائم کیا گیا ہے۔