جنگل کے بیچوں بیچ پڑے پراسرار سبز صندوق میں کیا ہے کوئی نہیں جانتا!

آسٹریلیا کے شہر نیو ساؤتھ ویلز کے گھنے جنگل میں پراسرار قسم کا سبز صندوق دیکھا گیا ہے جبکہ اس مقفل باکس کے بارے میں کوئی نہیں جانتا۔

گزشتہ دنوں سوشل میڈیا پلیٹ فارم ریڈڈٹ پر ایک تصویر شیئر کی گئی تھی، جس میں کہا گیا تھا کہ یہ صندوق سڈنی کے مغرب میں ایک میل سے بھی کم فاصلے پر واقع قصبہ کٹومبا کے قریب ایک پگڈنڈی کے نیچے پایا گیا ہے۔

یہ صندوق بلیو ماؤنٹینز نیشنل پارک کی جیمیسن ویلی میں ہائیکنگ پگڈنڈی کے گھنے درختوں کے اندر ایک درخت سے جکڑا ہوا ملا تھا۔

اس صندوق کے سامنے والے حصے میں کچھ سوراخ بھی موجود ہیں۔ ایک روپی نامی صارف نے اس باکس کے بارے میں تجسس کا اظہار کرتے ہوئے تھریڈ پر لکھ کہ ’یہ باکس کیا ہے؟‘

ریڈڈٹ پر موجود صارفین نے بھی اس پراسرار صندوق کے اندر موجود چیزوں کے حوالے سے مختلف خیالات کا اظہار کیا ہے۔

ایک شخص نے کہا کہ ’اندر ایک بلی ہے، وہ زندہ یا مردہ ہو سکتی ہے،‘ ایک صارف نے جواب دیا کہ، اگر اندر بلی موجود ہے تو وہ کافی بے بس ہوگی اسے زندہ اور مردہ دونوں سمجھا جا سکتا ہے۔

زیادہ تر لوگوں کا خیال تھا کہ باکس میں کوئی دفینہ ہو سکتا ہے جسے کسی شخص نے برسوں قبل چھپایا ہو گا۔ تاہم باکس میں کیا چیز موجود ہے یہ اب تک واضح نہیں ہوسکا ہے۔