محمد حفیظ کا حالیہ ناکام دورہ آسٹریلیا سے متعلق اہم انکشاف

پاکستان کرکٹ ٹیم کے سابق ڈائریکٹر محمد حفیظ نے انکشاف کیا ہے کہ انہیں حالیہ دورہ آسٹریلیا کی ناکامی کی وجوہات سامنے لانے سے روک دیا گیا۔

پاکستان کرکٹ ٹیم کے سابق کپتان وٹیم ڈائریکٹر محمد حفیظ نے کراچی میں میڈیا سے گفتگو میں انکشاف کیا ہے کہ انہیں حالیہ دورہ آسٹریلیا میں ناکامی کی وجوہات کو سامنے لانے سے روک دیا گیا لیکن جب بھی موقع ملا تو وجوہات ضرور سامنے لاؤں گا۔

محمد حفیظ نے کہا کہ دورہ آسٹریلیا اور نیوزی لینڈ کی ناکامی کی پہلی ذمے داری میں خود لیتا ہوں، ہم آسٹریلیا میں آج تک نہیں جیتے مگر ایک دن ایسا ضرور آئے گا جب ہم آسٹریلیا کی سر زمین پر اس سے جیتیں گے۔

سابق ٹیم ڈائریکٹر نے کہا کہ چیئرمین پی سی بی کا انتخاب سیاسی بنیادوں پر نہیں ہونا چاہیے، نئے چیئرمین پی سی بی محسن نقوی نگراں دور حکومت میں آئے، وہ منتخب ہیں تو ان کو پورا وقت ضرور دینا چاہیے۔

ان کا یہ بھی کہنا تھا کہ کھیلوں میں سفارشی کلچر نہیں ہونا چاہیے، نوجوانوں سے کہتا ہوں سفارش کے بغیر بھی آپ اوپر آ سکتے ہیں۔

واضح رہے کہ پاکستان کرکٹ ٹیم نے دسمبر، جنوری میں آسٹریلیا اور نیوزی لینڈ کے دورے کیے تھے جہاں کینگروز کی سر زمین پر گرین شرٹس کو تین ٹیسٹ میچوں کی سیریز میں وائٹ واش کی ہزیمت اٹھانا پڑی تھی جب کہ نیوزی لینڈ میں پانچ ٹی ٹوئنٹی میچوں کی سیریز میں بال بال وائٹ واش سے بچی تھی تاہم سیریز کیویز نے چار ایک سے اپنے نام کی تھی۔