قومی ٹیم کی نئی سلیکشن کمیٹی کے ممکنہ نام سامنے آگئے

کراچی: قومی کرکٹ ٹیم کی نئی سلیکشن کمیٹی کے ممکنہ نام سامنے آگئے۔

اے آر وائی نیوز کے مطابق سابق کرکٹر محمد یوسف، اسد شفیق، بلال یوسف سلیکشن کمیٹی کا حصہ ہوں گے، کپتان اور کوچ بھی سلیکشن کمیٹی میں شامل ہوں گے۔

وائٹ بال ٹیم کی سلیکشن میں گیری کرسٹن کمیٹی کا حصہ ہوں گے۔

ذرائع کا بتانا ہے کہ ریڈ بال ٹیم کی سلیکشن میں جیسن گلیسپی ٹیم کی معاونت کریں گے۔

خیال رہے کہ گزشتہ روز پی سی بی نے وہاب ریاض اور عبدالرزاق کو سلیکشن کمیٹیوں سے الگ کرنے کی تصدیق کرتے ہوئے کہا تھا کہ دونوں کی مین اور ویمن سلیکشن کمیٹی میں خدمات درکار نہیں۔

وہاب ریاض نے ردعمل دیتے ہوئے کہا تھا کہ کہنے کو بہت کچھ ہے لیکن بلیم گیم کا حصہ نہیں بننا چاہتا، پی سی بی کے ساتھ بطور سلیکشن کمیٹی ممبر میرا سفر ختم ہوا۔

ان کا کہنا تھا کہ پوری ایمانداری سے اس کھیل کی خدمت کی جس سے محبت کرتا ہوں۔

وہاب ریاض کا کہنا تھا کہ ’7 رکنی سلیکشن کمیٹی کے ساتھ کام کرکے بہت اچھا لگا، اس کمیٹی میں تمام ارکان کے ووٹ کی یکساں حیثیت تھی۔

سابق رکن سلیکشن کمیٹی کا کہنا تھا کہ تمام ممبران نے ایک ٹیم کی حیثیت سے سلیکشن کی جس کا حصہ رہنا میرے لیے فخر کی بات ہے۔