سعودی فٹبال کلب الہلال نے مسلسل فتوحات کا عالمی ریکارڈ بنا ڈالا

سعودی عرب کے معروف فٹبال کلب ’’الہلال کلب‘‘ نے مسلسل 28 فتوحات حاصل کر کے عالمی ریکارڈ بنا ڈالا اور اپنا نام گنیز بک آف ورلڈ ریکارڈ میں درج کرا لیا۔

غیر ملکی میڈیا کے مطابق الہلال فٹبال کلب نے ایشیئن چیمپئنز لیگ کے کوارٹر فائنل میں اتحاد کلب کو صفر کے مقابلے میں دو گول سے شکست دی تو یہ اس کی مسلسل 28 ویں فتح تھی یوں اس نے نیو سنیٹس کلب کو پیچھے چھوڑتے ہوئے مسلسل سب سے زیادہ فتوحات کا عالمی ریکارڈ قائم کر لیا۔

گنیز بک آف ورلڈ ریکارڈ نے بھی الہلال فٹبال کلب کا یہ عالمی اعزاز تسلیم کرتے ہوئے اس کا نام ریکارڈ بک میں درج کر لیا ہے۔

الہلال کلب کے صدر فہد بن نافل نے اپنے ایکس اکاونٹ پر اپنے تہنیتی پیغام میں کہا کہ ہمارے ہیروز اور شائقین کو یہ کامیابی مبارک ہو۔

انہوں نے مزید لکھا کہ الہلال کا ریکارڈ اب گنیز بک آف ورلڈ ریکارڈ میں درج ہو گیا ہے، وطن عزیز اور الہلال کی کامیابیوں کا سفر جاری رہے گا۔

واضح رہے کہ اس سے قبل سب سے زیادہ فتوحات کا عالمی ریکارڈ 2016-17 کے سیزن میں ویلش ٹیم دی نیو سنیٹس کلب کے پاس تھا جو اس نے مسلسل 27 کامیابیاں حاصل کرکے بنایا تھا۔

دریں اثنا الہلال کلب اپنی اس 28 ویں کامیابی سے مسلسل فتوحات کا عالمی ریکارڈ قائم کرنے کے ساتھ چیمپینئز لیگ کے سیمی فائنل میں بھی پہنچ گئی ہے۔

الہلال کلب اس وقت چیمپیئنز لیگ کے نو میچز جیت چکی ہے اور سعودی پرو لیگ میں 12 پوائنٹس کے ساتھ برتری قائم کیے ہوئے ہے۔