کیا بابراعظم نیوزی لینڈ کیخلاف نہیں کھیل رہے؟ ہیڈکوچ کا اہم بیان

قومی ٹیم کے ہیڈکوچ اظہرمحمود نے کہا ہے کہ نیوزی لینڈ کے خلاف ٹی ٹوئنٹی سیریز میں ہو سکتا ہےکہ بابراعظم کو آرام دیا جائے ایسا نہیں کہ بابراعظم یا کوئی کھلاڑی آرام نہیں کرسکتا۔

راولپنڈی میں پریس کانفرنس کرتے ہوئے اظہرمحمود نے کہا کہ پاکستان کے پاس باؤلر اور بیٹرز باصلاحیت ہیں جب کہ ٹاپ آرڈر کافی مضبوط ہے، محمدعامر اور عماد وسیم کے آنے سے ٹیم مضبوط ہوئی ہے۔

انہوں نے کہا کہ نیوزی لینڈ کا اسکواڈ نیا ہے لیکن ڈومیسٹک کرکٹ کا تجربہ رکھتے ہیں ان میں ٹیلنٹ کافی جلدی سامنے آ جاتا ہے ٹی ٹونٹی میں کوئی بھی ٹیم ہلکی نہیں ہوتی، نیوزی لینڈ کی بی یا سی ٹیم نہیں کہوں گا۔

اظہرمحمود نے کہا کہ پاکستان نے حال ہی میں ٹی ٹونٹی ورلڈکپ کا فائنل اور سیمی فائنل کھیلا لیکن چیمپیئنز ٹرافی 2017 کے بعد بڑا ٹورنامنٹ نہیں جیتے، پاکستان کو ٹی ٹونٹی ٹورنامنٹ میں نظرانداز نہیں کر سکتے بہتری کی گنجائش ہمیشہ ہوتی۔

ٹیم کمبی نیشن سے متعلق ان کا کہنا تھا کہ باؤلنگ بیٹنگ کے پلان پر کام جاری ہے کھلاڑیوں کو کہا کہ 6 جون کو پہلا ورلڈکپ کا میچ کھیلیں تو ہمارا بہترین اسکواڈ ہو، پاکستان کے پاس ایسے پلیئرز ہیں جو مستقل میں بڑے ریکارڈ بنا سکتے ہیں، ہو سکتا ہےکہ بابراعظم کو آرام دیا جائے ایسا نہیں کہ بابراعظم یا کوئی کھلاڑی آرام نہیں سکتا، روٹیشن پالیسی کو مدنظر رکھ کر پلیئنگ الیون بنائی جائےگی بارش کے باعث دو اسپنرز کے ساتھ بھی جایا جاسکتا ہے۔

ان کا کہنا تھا کہ ٹاپ ٹیموں کا آج کل پہلے بیٹنگ کرنے کا اوسط اسکور 170 ہے پاکستان کا پہلے بیٹنگ کرتے ہوئے اوسط اسکور 160 کے آس پاس ہے مجھے عامرجمال بہت پسند ہے باصلاحیت ہے، پی ایس ایل اور دورہ آسٹریلیا پر عامرجمال کو کھیلتے دیکھا، کمال کھیلا، عامرجمال جینوئن آل راؤنڈر ہیں پاکستان کو پلئیرز بنانے پڑیں گے، جلد بازی سے کام نہیں لینا چاہے صبر کرنا پڑےگا۔

اوپنرز سے متعلق ہیڈکوچ نے واضح کیا کہ ہم نے ابھی فیصلہ نہیں کیا کون اوپننگ کرےگا،  فخر، رضوان، بابر، صائم کون اوپن کرےگا؟ 18 اپریل کو معلوم ہوجائےگا، شاہین آفریدی مکمل فٹ ہیں انہیں کوئی انجری نہیں میں نے بھی سنا ہے کہ شاہین آفریدی پہلا میچ نہیں کھیلیں گے لیکن ابھی ایسا کچھ فیصلہ نہیں ہوا۔