ویسٹ انڈیز نے نوآموز پاپوانیوگنی کو کرکٹ کا سبق پڑھا دیا

ویسٹ انڈیز نے روسٹن چیس کی ذمہ دارانہ اننگز کی بدولت ٹی ٹوئنٹی ورلڈکپ کے اپنے پہلے مقابلے میں پاپوانیوگنی کو شکست دیدی۔

تفصیلات کے مطابق پاپوانیوگنی نے پہلے کھیلتے ہوئے ویسٹ انڈیز کو جیت کیلئے 137 رنز کا ہدف دیا، روسٹن چیس کے ناقابل شکست 42 رنز کی بدولت ویسٹ انڈیز نے 5 وکٹوں کے نقصان پر 19 ویں اوور میں ہدف پورا کرلیا۔

اوپنر برینڈن کنگ 34 اور نکولس پوران 27 رنز بنا کر نمایاں رہے جبکہ آندرے رسل 11 رنز بنا کر ناٹ آؤٹ رہے۔

پاپوانیوگنی کی جانب سے کپتان اسد والا نے دو وکٹیں حاصل کیں، الائی ناؤ، چاڈ سوپر اور جان کاریکو بھی ایک ایک وکٹیں حاصل کرنے میں کامیاب رہے۔

اس سے قبل ٹی ٹوئنٹی ورلڈکپ کی نوآموز ٹیم پاپوانیوگنی پہلے بیٹنگ کرتے ہوئے ویسٹ انڈیز کے سامنے بڑا مجموعہ اسکور بورڈ پر سجانے میں ناکام رہی، پاپوانیوگنی نے 8 وکٹوں کے نقصان پر 136 رنز بنائے۔

سیسی باؤ 43 گیندوں پر 50 رنز بناکر نمایاں رہے، چیڈسوپر نے 27 جبکہ کپتان اسد والا نے 21 رنز کی اننگز کھیلی۔

ویسٹ انڈیز کی طرف سے آندرے رسل اور الزاری جوزف نے 2، 2 وکٹیں حاصل کیں۔ عقیل حسین، روماریو شیفرڈ اور گوڈا کیش موتی 1، 1 وکٹ حاصل کرنے میں کامیاب رہے۔

اس سے قبل آئی سی سی ٹی ٹوئنٹی ورلڈکپ کے دوسرے میچ میں سابق عالمی چیمپئن ویسٹ انڈیز نے ٹاس جیت کر پاپوانیوگنی کو بیٹنگ کی دعوت دی ہے۔ ویسٹ انڈیز کے کپتان روومین پاویل کا کہنا تھا کہ پچ دیکھنے میں تھوڑی مختلف لگ رہی ہے۔

ویسٹ انڈین کپتان نے کہا کہ کوشش کریں گے کہ اچھی کرکٹ کھیلی جائے۔ ہمارے تمام کھلاڑی ٹی ٹوئنٹی ورلڈکپ کیلئے بہت پرجوش ہیں۔

کپتان پاپوانیوگنی پی این جی اسدوالا نے کہا کہ پچ دیکھنے میں بہت اچھی لگ رہی ہے، ہمیں یہاں 2 ہفتے سے زائد وقت ہوچکا ہے، ہماری ٹیم نے یہاں وارم اپ میچ بھی کھیلے ہیں۔