صنم سعید کو اپنے نام سے الجھن کیوں تھی؟

شوبز انڈسٹری کی معروف اداکارہ صنم سعید کا کہنا ہے کہ انہیں پہلے اپنا نام پسند نہیں تھا اور انہیں اس سے الجھن ہوتی تھی۔

اداکارہ صنم سعید نے اے آر وائی ڈیجیٹل کے پروگرام ’دی ناک ناک شو‘ میں شرکت کی جہاں انہوں نے میزبان و شوہر محب مرزا کی جانب سے پوچھے گئے مختلف سوالات کے جوابات دیے۔

محب مرزا نے پوچھا کہ ماضی میں آپ کو اپنے نام سے الجھن تھی، ایسا کیوں تھا؟

صنم سعید نے کہا کہ میرا نام تقریباً ہر بھارتی گانے میں آتا تھا، ہر کوئی میرا نام لے کر گانا گاتا تھا جو کہ مجھے بالکل پسند نہیں تھا۔

محب مرزا نے مسکراتے ہوئے کہا کہ رکشوں کے پیچھے بھی آپ کا نام ’میرے صنم‘ درج ہوتا ہے۔ صنم سعید نے قہقہہ لگاتے ہوئے کہا کہ رکشوں کے پیچھے، ہر جگہ اس نام کا استعمال ہوتا تھا، اس لیے پہلے مجھے اپنا نام پسند نہیں تھا مگر اب اپنا نام اچھا لگتا ہے۔

واضح رہے کہ محب مرزا اور صنم سعید نے گزشتہ برس مارچ میں اپنی شادی کا باضابطہ اعلان کیا تھا، دونوں کی یہ دوسری شادی ہے۔