زندگی میں کامیابی کے 8 رہنما اصول

زندگی میں کچھ عام سی باتیں ایسی ہوتی ہیں جنہیں ہم اکثر نظرانداز کر دیتے ہیں حالانکہ یہی چھوٹی چھوٹی باتیں ہماری کامیابی میں نمایاں کردار ادا کر سکتی ہیں۔

کسی بھی انسان کیلئے اچھی اور کامیاب زندگی گزارنے کیلیے ضروری ہے کہ اس کے سامنے کوئی بڑا مقصد ہو، جس کو پورا کرنے کیلئے وہ صدق دل اور نیک نیتی سے محنت کرے۔

انسان کیلئے کوئی بھی تبدیلی کرنا آسان نہیں ہوتا مگر اس کے لیے کی جانے والی مخلصانہ کوششیں اہم اور قابل قدر ضرور ہوتی ہیں۔

اس حوالے سے ماہرین کا کہنا ہے کہ کچھ خاص کام یا سرگرمیاں ایسی ہیں اور ان کے لیے کوئی مشقت بھی درکار نہیں لیکن یہ آپ کو کامیاب ترین انسانوں کی فہرست میں پہنچا سکتی ہیں۔

ماہرین نے ان کاموں کو 8 حصوں میں تقسیم کیا ہے، جن میں صبح سویرے اٹھنا ، مراقبہ ،ورزش صحت بخش ناشتہ ،مقاصد کا تعین، ترجیحاتی کاموں کی فہرست ان تمام باتوں کا خیال رکھ کر آپ اپنی زندگی کو اچھی طرح منظم کر سکتے ہیں۔

صبح سویرے اٹھنا :

زندگی میں نظم و ضبط لانے کے لئے صبح سویرے کی عادات بہت اہم ہیں، پلاننگ کے ساتھ دن کا آغاز کیا جائے تو بہت سے کام آسان ہوسکتے ہیں۔ طے شدہ جاگنے کے اوقات سے اپنے دن کا آغاز کریں اوردن کے لئے مثبت ٹون کو سیٹ کریں۔

صحت بخش ناشتہ

اس میں کوئی دو رائے نہیں کہ غذائیت سے بھرپور اور صاف ستھری خوراک آپ کی صحت اور پُرکشش و جاذبِ نظر دِکھنے میں بہت اہم کردار ادا کرتی ہے۔ آپ جس قدر صحت بخش غذائیں کھائیں گے، اتنی ہی زیادہ یہ آپ کے چہرے سے شادابی کی صورت جھلکیں گی۔ لہٰذا رات بھر کے خالی پیٹ کو صبح ایک صحت بخش ناشتے سے بھریں اور دن بھر توانا رہیں۔

زندگی میں کسی ایک کام کو اپنا مقصد لازمی بنائیں :

دن کے آغاز میں اپنی اولین ترجیحات کی فہرست مرتب کریں، مقاصد کا تعین آپ کی زندگی میں نظم و ضبط لائے گا۔ زندگی کو کسی مقصد کے تحت گزارنا آپ کو صحت مند رکھتا ہے ایسے افراد طویل عمر پاتے ہیں۔

اچھے اور ذہین لوگوں کی صحبت اختیار کریں

کہتے ہیں کہ انسان کی پہچان اس کے دوستوں سے ہوتی ہے، اگر آپ کے آس پاس مثبت سوچ رکھنے والے قابل افراد ہیں تو آپ بھی مثبت سوچیں گے یا اگر آپ کی سوچ مثبت ہیں تو اپنی ہی جیسے لوگوں سے دوستی رکھیں گے اس طرح آپ میں اچھا اور تعمیری کام کرنے کا جذبہ اور زیادہ پروان چڑھے گا۔

موبائل فون اور سوشل میڈیا کے استعمال ضرورت کے تحت کریں

اکثر دیکھا گیا ہے کہ کچھ لوگوں کو صبح اٹھتے ہی پہلا کام موبائل یا سوشل میڈیا کا جائزہ لینا ہوتا ہے حالانکہ یہ نہ صرف آپ کا وقت ضائع کرتا ہے بلکہ ذہن کو بھی الجھا دیتا ہے۔ اس لیے کوشش کریں کہ ایسی مصروفیات سے خود کو جس حد تک ممکن ہوسکے دور رہیں۔

لکھنے کی عادت اپنائیں

ماہرین کہتے ہیں کہ لکھی ہوئی بات انسان کے ذہن میں رہتی ہے جس سے اسے اپنے ہدف کی طرف بڑھنے میں آسانی ہوتی ہے۔ اس لیے آپ کا جو بھی ارادہ ہو اس کو لکھنے کی عادت ڈالیں اور اسے دن میں دو بار پڑھیں۔ یہ ایک آسان نسخہ ہے جس کے کوئی مضر اثرات بھی نہیں ہیں۔

کسی غیرجانبدار شخص سے رائے لیں

اپنے حلقہ احباب میں کسی ایسے غیرجانبدار شخص کو تلاش کریں جو آپ کی صحیح رہنمائی کرسکے اور آپ کو آپ کے ممکنہ فیصلے کے بارے میں فیڈ بیک دے سکے۔

کسی غیر جانبدار شخص کی تلاش اور اس سے فیڈبیک لینا کلیدی حیثیت کا حامل ہے کیونکہ ایسا شخص آپ کے ذہن میں موجود اہداف کے حصول میں کافی مددگار ہو سکتا ہے۔

خود میں بہتری لانے کی کوشش جاری رکھیں

کہتے ہیں کہ خود کو بدلے بغیر حالات بدلنے کی خواہش رکھنا حماقت ہے، بُرے حالات اچانک بھی آجاتے ہیں لیکن اچّھے حالات لانے کے لیے وقت درکار ہے۔ یہی وجہ ہے کہ محنت، صبر اور مستقل مزاجی سے عاری جلد باز انسان اچھے حالات دیکھنے سے پہلے ہی دنیا سے چلا جاتا ہے۔ آپ تو ابھی زندہ ہیں، خود کو بدلیں اور حالات سے مراد صرف مالی حالات نہیں معاشرتی حالات بھی ہیں۔