روزے میں سر درد کا علاج کیا ہے؟ جان کر حیران رہ جائیں گے

ماہ رمضان میں اکثر روزہ داروں کو مختلف وجوہات کی بنا پر سر درد کی شکایات ہوتی ہیں، جس کی بڑی وجہ خون میں شوگر یا پانی کی کمی سمیت کیفین اور نیند کی کمی شامل ہے۔

اس حوالے سے اے آر وائی نیوز کے پروگرام باخبر سویرا میں حکیم امجد اسماعیل نے روزے کی حالت میں ہونے والے درد سر اور اس کے علاج سے متعلق اہم باتیں بتائیں۔

ان کا کہنا تھا کہ روزے کے دوران جسم میں پانی کی کمی، شوگر اور نمکیات کی کمی بے شمار مسائل کا سبب بن سکتی ہے جن میں سر درد، سستی، پٹھوں میں کمزوری، چکر آنا، بلڈ پریشر میں کمی، دل کی دھڑکن میں اضافہ، بخار اور دیگر شدید وجوہات میں آپ بے ہوش بھی ہوسکتے ہیں۔

انہوں نے کہا کہ رمضان کے ابتدائی روزوں میں عموماً دوپہر سے پہلے یا افطار سے قبل اور بعد میں بھی سر درد شروع ہو جاتا ہے جس کی وجہ سے انسان اپنی توجہ کام پر مرکوز نہیں کر سکتا اور وقت بھی ضائع ہوتا ہے۔

ان کا کہنا ہے کہ رمضان کے دوران سر درد کا امکان جسم میں لیکوڈز یا پانی کی کمی، شریانوں میں تناؤ کے ساتھ شوگر کی نمایاں کمی اور کم کیفین کی وجہ سے بڑھ جاتا ہے، یہ سب اس درد کے دورے میں اضافے کا باعث بن سکتے ہیں۔

انہوں نے بتایا کہ افطار کے بعد ہونے والے سر درد کی بڑی وجہ خالی پیٹ ایک دم بہت زیادہ ٹھنڈا پانی پی لینا ہے۔ اگر سر درد سے بچنا چاہتے ہیں تو افطار میں پانی اعتدال کے ساتھ پئیں۔