کراچی میں چکن گونیا بے قابو، 411 کیسز رپورٹ

کراچی : چکن گونیا کے مریضوں میں مسلسل اضافہ ہورہا ہے، 411 رپورٹ ہوئے ہیں اور صرف کراچی میں 153 کی تصدیق ہوئی ہے۔

تفصیلات کے مطابق کراچی میں چکن گونیا، ڈینگی اور ملیریا کے ساتھ دیگر وائرل انفیکشنز کے کیسز میں خطرناک حد تک اضافہ ہوا ہے۔

صوبائی وزارت صحت نے بتایا کہ صوبہ سندھ میں چکن گنیا کے مشتبہ کیسز میں قابل ذکر اضافہ دیکھا گیا ہے، جن میں 411 رپورٹ ہوئے ہیں اور صرف کراچی میں 153 کی تصدیق ہوئی ہے۔

وزارت صحت کا کہنا ہے کہ ڈینگی کے کیسز میں بھی اضافہ ہورہا ہے، رواں سال سندھ میں 1,724 کیسز رپورٹ ہوئے، جن میں کراچی سے 1484 کیسز بھی شامل ہیں تاہم ڈینگی سے ایک ہلاکت بھی ہوئی ہے۔

اس کے ساتھ ہی ملیریا کے کیسز بھی بڑھ رہے ہیں، سندھ میں حیرت انگیز طور پر 2,22,239 کیسز رپورٹ ہوئے ہیں، جن میں کراچی سے 1,768 کیسز شامل ہیں۔

کراچی میں طبی ماہرین روزانہ مریضوں کی ایک بڑی تعداد دیکھ رہے ہیں جن کی علامات میں بخار، جسم میں درد اور پیروں میں سوجن شامل ہیں۔

چکن گونیا کے مشتبہ کیسز کی بڑھتی ہوئی تعداد ایک تشویش کا باعث ہے، لیکن تشخیصی ٹیسٹوں کی زیادہ قیمت ٹیسٹ کے خواہاں بہت سے شہریوں کے لیے ایک رکاوٹ ہے۔