پیرس اولمپکس کی افتتاحی تقریب سے قبل ہائی اسپیڈ ٹرین نیٹ ورک پر حملے

پیرس اولمپکس کی افتتاحی تقریب شروع ہونے سے چند گھنٹے قبل ہنگامہ آرائی اور ہائی اسپیڈ ٹرین نیٹ ورک پر حملے کئے گئے ہیں۔

غیر ملکی ذرائع ابلاغ کے مطابق شر پسندوں کی جانب سے ریلوے اسٹیشن پر توڑ پھوڑ اور آگ لگائی گئی ہے جس سے ریلوے کا نظام شدید متاثر ہوا ہے۔

مقامی میڈیا کا کہنا ہے کہ ہائی اسپیڈ ٹرین نیٹ ورک پر حملے بد نیتی پر مبنی کارروائیاں ہیں، جن کا کوئی جواز نہیں بنتا۔

فرانسیسی ریل کمپنی کے حکام کے مطابق نیٹ ورک مفلوج کرنے کے لیے بڑے پیمانے کا حملہ کیا گیا ہے۔حملوں کا مقصد ریلوے کے نظام کو مفلوج کرنا تھا۔

حکام نے بتایا کہ شرپسندوں کے حملوں کے سبب ٹرینوں کی بڑی تعداد کو منسوخ کردیا گیا ہے جبکہ کئی ٹرینوں کو متبادل روٹس فراہم کیے گئے ہیں۔

حکام کے مطابق انجینئرز کی ٹیمیں متاثرہ جگہوں پر روانہ کردی گئی ہیں جو معاملات کو بہتری کی جانب لانے کے لئے کاموں میں مصروف ہیں۔

برطانوی میڈیا کا اس حوالے سے کہنا ہے کہ ریلوے کمپنی یورو اسٹار کی جانب سے مسافروں کو سفر کرنے سے گریز کرنے کا کہا گیا ہے۔

یمن میں تارکین وطن کی کشتی کو حادثہ، 45 افراد ڈوب گئے

سوئس ریل آپریٹر کے بیان کے مطابق سوئٹزرلینڈ سے فرانس جانے والی ٹرینیں متاثر نہیں ہوئی ہیں اور معمول کے مطابق اپنے امور انجام دے رہی ہیں۔