عید مبارک ویکسینیشن، شاپنگ سینٹرز اور تفریحی مقامات پر پولیو ویکسین کا اہتمام

اسلام آباد: ملک بھر میں عیدالاضحیٰ کی رونقیں شروع ہوتے ہی پاکستان پولیو پروگرام نے بچوں کو پولیو سے محفوظ رکھنے اور پولیو وائرس کے پھیلاؤ کو روکنے کے لیے ایک خصوصی مہم شروع کر دی ہے۔

ترجمان پولیو پروگرام کے مطابق ’عید مبارک ویکسینیشن انیشی ایٹیو‘کے تحت ملک کے 20 سے زائد اضلاع میں شاپنگ سینٹرز اور چڑیا گھر جیسے تفریحی مقامات پر 187 خصوصی پولیو ویکسینیشن اسٹالز لگائے گئے ہیں، جہاں والدین پولیو کے خاتمے میں پولیو پروگرام کا ساتھ دے سکتے ہیں۔

اس اقدام کا مقصد پولیو ویکسین کی اہمیت کے بارے میں آگاہی پیدا کرنا، والدین کو اس موذی مرض کے خلاف جنگ میں براہ راست شامل کرنا اور عوام میں ویکسینیشن کو فروغ دینا ہے۔

ترجمان نے کہا کہ والدین ان اسٹالز پر تربیت یافتہ پولیو ورکرز کی مدد سے اپنے بچوں کو خود ویکسین پلانا سیکھ سکتے ہیں اور پولیو کے خلاف جنگ میں ہمارا ساتھ دے سکتے ہیں۔

انسداد پولیو کے لیے قائم نیشنل ایمرجنسی آپریشنز سینٹر کے کوآرڈینیٹر، کیپٹن (ر) محمد انور الحق نے کہا ’’عید مبارک ویکسینیشن انیشی ایٹیو لوگوں سے جڑنے اور انھیں پولیو کے خاتمے کی کوششوں کا فعال حصہ بنانے کا ایک بہترین موقع ہے۔‘‘

انھوں نے کہا ’’والدین پولیو کے خلاف جنگ میں ہمارے اہم اتحادی ہیں اور انھیں ویکسینیشن کے عمل میں شامل کر کے ہم نہ صرف پولیو ویکسین کی اہمیت کے بارے میں آگاہی پیدا کر رہے ہیں بلکہ ویکسینز کے حامی بھی بنا رہے ہیں۔‘‘