بھارتی خاتون شوٹر نے پیرس اولمپکس میں اپنے ملک کیلئے پہلا میڈل جیت لیا

پیرس اولمپکس میں بھارت نے بھی میڈل حاصل کرنے کا کھاتہ کھول لیا، خاتون شوٹر نے 10 ایم ایئر پسٹل میں برونز میڈل اپنے نام کیا۔

منو بھاکر اولمپک گیمز میں شوٹنگ میں تمغہ جیتنے والی پہلی بھارتی خاتون بھی بن گئیں، شوٹنگ میں مجموعی طور پر بھارت نے 12 سال بعد اولمپک میں کوئی تمغہ حاصل کیا۔ آخری بار ہندوستان نے اولمپکس میں 2012 کے لندن ایڈیشن میں میڈل جیتا تھا۔

فائر پسٹل شوٹر وجے کمار نے لندن اولمپکس میں چاندی اور 10 میٹر ایئر رائفل کے نشانے باز گگن نارنگ نے کانسی کا تمغہ جیتا تھا، اس بار منو بھاکر برونز میڈل جیتنے میں کامیاب رہی ہیں۔

منو بھاکر نے جیت کے بعد کہا کہ ٹوکیو اولمپکس کے بعد میں بہت مایوس ہوئی تھی اور مجھے اس پر قابو پانے میں کافی وقت لگا، سچ کہوں تو میں یہ بیان نہیں کر سکتی کہ میں آج کتنا اچھا محسوس کر رہی ہوں۔

خیال رہے کہ بھارتی خاتون شوٹر نے عمدہ پرفارنس دکھاتے ہوئے پیرس اولمپک 2024 میں 10 ایم ایئر پسٹل کے کوالیفائنگ مقابلے میں تیسری پوزیشن حاصل کی تھی۔

خاتون شوٹر منو بھاکر نے اپنی کارکردگی کی بنا پر فائنل کے لیے سیٹ پکی کی تھی، انھوں نے کوالیفائنگ مقابلے میں شامل تمام شوٹرز سے زیادہ یعنی 27 مرتبہ 10 پوائنٹس پر نشانہ لگایا تھا۔

منو بھاکر نے مجموعی طور پر 60 نشانے لگائے جس میں 580 پوائنٹس حاصل کیے، ہنگری کی میجر ویرونیکا اور کوریا کی اوہ یے جِن 582، 582 پوائنٹس کے ساتھ پہلے اور دوسرے نمبر پر رہی تھیں۔