انگلش ٹیسٹ کپتان بین اسٹوکس کے گھر میں ڈکیتی

انگلش ٹیسٹ کپتان بین اسٹوکس کے گھر میں ڈکیتی کی واردات ہوئی ہے، نقاب پوش افراد گھر سے زیورات اور قیمتی اور نایاب اشیاء لے اڑے۔

انگلش ٹیسٹ کپتان نے سامان کی واپسی کیلئے سوشل میڈیا پر متعلقہ حکام سے مدد کی اپیل کردی، ڈکیتی کا واقعہ 17 اکتوبر کو کاسل ایڈن میں پیش آیا اُس وقت بین اسٹوکس پاکستان میں ٹیسٹ سیریز کھیل رہے تھے۔

سماجی رابطے کی ویب سائٹ ایکس پر اپنے پیغام میں انہوں نے لکھا کہ جب ڈکیتی کی واردات ہوئی اہلیہ اور دو بچے گھر میں ہی موجود تھے تاہم اہل خانہ محفوظ رہے۔

اسٹوکس نے اپنے ایکس اکاؤنٹ پر واقعے کی تفصیلات اور چوری کیے گئے سامان کی تصاویر شیئر کیں۔ ان اشیاء میں 2019 میں دیا گیا او بی ای اعزاز، کرسچین ڈائر کا ایک ہینڈ بیگ، انگلینڈ کرکٹ کے نشان والا سونے کا انگوٹھی اور کچھ بریسلیٹ شامل تھے۔

ان کا کہنا ہے کہ ان چوری کی جانے والی اشیاء میں سے اکثر کا تعلق میرے اور میرے خاندان کے لیے جذباتی طور پر بہت زیادہ اہمیت کا حامل ہے اور یہ ناقابلِ تلافی نقصانات ہیں۔