ارشد ندیم اور نیرج کی ماؤں نے بہت مثبت پیغام دیا، وسیم اکرم

سوئنگ کے سلطان اور سابق کپتان پاکستان کرکٹ ٹیم وسیم اکرم نے کہا ہے کہ اولمپک گولڈ میڈلسٹ ارشد ندیم اور نیرج کی ماؤں نے بہت مثبت پیغام دیا ہے۔

سابق کپتان وسیم اکرم نے میلبرن میں میڈیا سے بات کرتے ہوئے کہا کہ اولمپک گولڈ میڈلسٹ ارشد ندیم نے جو کارنامہ انجام دیا اس سے پوری دنیا دنگ رہ گئی ہے۔

اُنہوں نے کہا کہ ہم پاکستانی ہونے کی حیثیت سے تو فخر کر ہی رہے ہیں لیکن پوری دنیا اس کے کارنامے پر فخر کر رہی ہے۔

وسیم اکرم نے کہا کہ ہمارے ملک میں ٹیلنٹ ہے، بس ٹیلنٹ کو مواقع نہیں ملتے لیکن ارشد ندیم نے اپنی محنت اور اپنے مواقع سے جو کیا اس سے پوری دنیا دنگ رہ گئی ہے۔

سوئنگ کے سلطان نے کہا کہ پاکستان میں مسئلہ یہ ہے کہ سہولیات نہیں ہیں، ٹیلنٹ کو نکھارا نہیں جاتا اس کیلئے تمام اسپورٹس باڈیز کو مل کر سوچنا ہوگا کہ کیسے فنڈز لانے ہیں۔

انہوں نے کہا کہ ارشد ندیم نے جو کارنامہ انجام دیا اس سے پوری قوم کو ایک امید ملی ہے کہ ہمارے ہاں جو ٹیلنٹ ہے اسے مواقع اور سہولیات دی جائیں تو وہ مزید کارنامے انجام دے سکتا ہے۔

وسیم اکرم کا کہنا تھا کہ ہمیں چاہیے کہ اکٹھے بیٹھیں، پلان کریں اور مخصوص اسٹیڈیمز بنائیں، اگر نوجوانوں کو مواقع نہیں دیں گے تو وہ فون پر ہی لگے رہیں گے۔

انعامات کی بارش، اب کہاں رہیں گے؟ ارشد ندیم کی والدہ نے بتادیا

انہوں نے کہا کہ اسپورٹس سیاست سے الگ ہے، لوگوں کا آپس میں رابطہ اہم ہے، دونوں کے والدین نے پوری دنیا میں مثبت تاثر بھیجا اور ارشد ندیم نے بھی کمال کیا انھیں بھی مبارکباد دیتا ہوں۔