ہالی ووڈ اداکار برینڈن فریزر نئے روپ میں جلوہ گر ہوں گے

لاس اینجلس : ہالی ووڈ فلموں کے نامور اداکار برینڈن فریزر بہت جلد پردہ اسکرین پر مداحوں کو ایک نئے انداز میں نظر آئیں گے۔

آسکر ایوارڈ یافتہ اداکار برینڈن فریزر دوسری جنگ عظیم کے موضوع پر بنائی جانے والی فلم ’پریشر‘ میں سابق امریکی صدر اور فوجی سربراہ ’ڈوائٹ ڈی آئزن ہاور‘ کا کردار ادا کریں گے۔

غیر ملکی خبر رساں ادارے کی رپورٹ کے مطابق عالمی شہرت یافتہ ہالی ووڈ فلموں ’دی ممی‘ اور ’دی ویل‘ میں اداکاری کے جوہر دکھانے والے اداکار برینڈن فریزر فلم میں اینڈریو اسکاٹ کے ساتھ مرکزی کردار میں نظر آئیں گے۔

مذکورہ فلم میں اینڈریو اسکاٹ نے برطانیہ کے چیف میٹرو لوجیکل آفیسر جیمی سٹیگ کا کردار ادا کیا ہے، جس کا کام کسی بھی حملے کی منصوبہ بندی سے قبل جنرل آئزن ہاور کو موسمی حالات سے آگاہی فراہم کرنا ہوتا ہے۔

فلم پریشر’ کی ہدایت کاری انتھونی ماراس کریں گے یہ فلم ماہ ستمبر میں برطانیہ میں ریلیز ہوگی۔ فلم کے دیگر کرداروں کے بارے میں ابھی باضابطہ اعلان نہیں کیا گیا ہے۔

فلم کی کہانی ڈیوڈ ہیگ اور انتھونی ماراس نے لکھی ہے، جو ہیگ کے مشہور ڈرامے پر مبنی ہے،

واضح رہے کہ آرمی جنرل آئزن ہاور نے 34 ویں امریکی صدر کے طور پر سال 1953سے 1961تک خدمات انجام دیں۔

جنرل آئزن ہاور کون تھے؟

امریکی فوج کے جنرل آئزن ہاور کو جنوری 1943ء میں مغربی یورپ میں اتحادی افواج کا سپریم کمانڈر بنایا گیا۔ سال1944ء میں جنرل کے عہدے پر فائز ہوئے۔

چھ جون 1946ء کو فرانس پر حملہ کیا اور پھر مغربی یورپ اور جرمنی پرحملوں کی کمان کی۔  1945 تا 1948 امریکی افواج کے چیف آف اسٹاف رہے۔ بعد ازاں ریٹائر ہو کر کولمبیا یونیورسٹی کے صدر بنے۔ 1951ء میں نیٹو کی افواج کے کمانڈر بنائے گئے۔

سال 1952میں انہوں نے ری پبلکن پارٹی کے امیدوار کی حیثیت سے صدارتی انتخاب میں حصہ لیا اور ڈیمو کریٹک پارٹی کے امیدوار ایڈلائی اسٹیونسن کو شکست دے کر صدارت کا عہدہ سنبھالا۔