کیا آپ جانتے ہیں کہ دنیا کی سب سے خطرناک سڑک کونسی ہے؟

ویسے تو دنیا بھر میں کئی خطرناک سڑکیں موجود ہیں تاہم کچھ راستے ایسے ہیں جن پر سفر کرنا انسان کو موت کی یاد دلا دیتا ہے۔

ترکیہ کے شمال مشرقی صوبے بائی برٹ میں واقع D915 نامی سڑک کو دنیا کی سب سے خطرناک سڑک کے طور پرجانا جاتا ہے۔ اچھے اچھے ڈرائیور اسے دنیا کی انتہائی خطرناک اور مشکل ترین سڑک سمجھتے ہیں۔

یہ سڑک اف نامی شہر سے بائی برٹ صوبے کے صدر مقام تک 65 میل (105 کلومیٹر) پر محیط ہے جبکہ اس سڑک پر سفر کرنا بھی ہر کسی کے بس کی بات نہیں۔

یہ بات بھی قابل ذکر ہے کہ کئی سالوں تک براعظم جنوبی امریکا کے ملک بولیویا کے یانگاس روڈ المعروف ڈیتھ روڈ نے دنیا کے خطرناک ترین سڑک کا غیر سرکاری اعزاز حاصل کررکھا تھا۔

پہاڑی علاقوں کے ماؤنٹین رینج سے 4650 میٹر بلندی پر واقع یانگاس روڈ بولیویا میں آنیوالے سیاحوں میں بہت مقبول ہے اور ہر سال یہاں پر 25 ہزار سے زیادہ سیاح آتے ہیں۔

تاہم اب چند مہم جو افراد کے مطابق بولیویا کے ڈیتھ روڈ کو بھی شمال مشرقی ترکیہ کی D915 نامی اس سڑک نے پیچیدگی اور مشکل میں پیچھے چھوڑ دیا ہے۔ اس سڑک پر جن لوگوں نے ڈرائیونگ کی ہے وہ اسے کافی مشکل قرار دیتے ہیں۔

یہ سڑک ترکیہ کے شمال مشرقی صوبہ اناطولیہ کو بحیرہ اسود (بلیک سی) سے ملاتی ہے، یہ پہاڑی سڑک بے پناہ موڑ، پیچ و خم اور اتار چڑھاؤ پر مشتمل ہے۔

ڈی 915 نامی روڈ نہ صرف دشوار گزار و تنگ راستوں پر مبنی ہے بلکہ بہت ماہر ڈرائیور بھی اس خطرناک سڑک پر گاڑی چلاتے ہوئے خود کو چوکناں رکھتے ہیں۔