نسیم شاہ ’’دی ہنڈریڈ‘‘ کے مہنگے ترین کھلاڑی، کئی نامور کرکٹر باہر

برطانوی ٹی 20 لیگ دی ہنڈریڈز میں پاکستانی پیسر نسیم شاہ کی دھوم مچ گئی سب سے مہنگی کٹیگری میں منتخب ہو گئے۔ کئی نامور کھلاڑیوں کو کسی ٹیم نے منتخب نہیں کیا۔

غیر ملکی میڈیا کے مطابق برطانیہ کی کرکٹ لیگ دی ہنڈریڈز میں پاکستانی پیسر نے انٹری دیتے ہی دھوم مچا دی اور سب سے مہنگی کٹیگری میں منتخب ہو گئے۔

رپورٹ کے مطابق برطانوی لیگ دی ہنڈریڈ کے ڈرافٹ میں 8 ٹیموں کے فرنچائزرز نے 32 کھلاڑیوں کو منتخب کیا، جس میں ملکی اور غیر ملکی کرکٹرز شامل تھے۔ پاکستانی پیسر نسیم شاہ کو برمنگھم فینکیس نے نے ایک لاکھ 25 ہزار یورو (پاکستانی 3 کروڑ، 77 لاکھ روپے) میں منتخب کیا۔

قومی ٹی ٹوئنٹی ٹیم کے کپتان شاہین آفریدی اور حارث رؤف کو دوبارہ ویلش فائر نے منتخب کیا۔ شاہین شاہ کو ایک لاکھ یورو (یعنی 3 کروڑ 1 لاکھ پاکستانی روپے سے زائد) میں اپنے اسکواڈ کا حصہ بنایا۔

پی ایس ایل میں اسلام آباد یونائیٹڈ کو ٹائٹل جتوانے میں اہم کردار ادا کرنے والے عماد وسیم کو ایک لاکھ پاؤنڈ (3 کروڑ 53 لاکھ پاکستانی روپے سے زائد) میں ٹرینٹ راکٹس اپنی ٹیم کا حصہ بنایا۔ پی ایس ایل 9 کے سب سے کامیاب بولر اسامہ میر کو مانچسٹر اوریجنل نے اپنی ٹیم میں شامل کیا۔

گزشتہ روز آخری لمحات میں ڈرافٹ میں اپنے ناموں کا اندارج کروانے والے بابراعظم، محمد رضوان سمیت پی ایس ایل 9 کا ٹائٹل جتوانے والی ٹیم اسلام آباد یونائیٹڈ کپتان شاداب خان، افتخار احمد، حسن علی اور سابق فاسٹ بولر محمد عامر کو کسی بھی فرنچائز نے منتخب نہیں کیا۔

اسی طرح بین الاقوامی کرکٹرز کے بڑے ناموں میں جیسن رائے، ڈیوڈ وارنر، ٹم ڈیوڈ اور شکیب الحسن کو بھی کسی فرنچائز نے اپنے اسکواڈ میں جگہ نہیں دی۔

برطانوی ٹی 20 لیگ ڈی ہنڈریڈ کے چوتھے ایڈیشن کیلئے پلئیرز ڈرافٹ میں 68 پاکستانی کھلاڑیوں نے رجسٹریشن کروائی تھی۔

واضح رہے کہ دی ہنڈریڈ کا چوتھا ایڈیشن جولائی میں شروع ہوگا، چوتھے ایڈیشن میں مینز اور ویمنز کی 8-8 ٹیمیں حصہ لیں گی، ایونٹ کا پہلا میچ 23 جولائی کو لارڈز کے کرکٹ گراؤنڈ میں برمنگھم فینیکس اور اوول انوینسیبلز کے درمیان کھیلا جائے گا جب کہ فائنل 18 اگست کو ہوگا۔