دفتر میں خوف کا ماحول پیدا کرنے والے شخص سے کیسے نمٹا جائے ؟

عام طور پر دیکھنے میں آتا ہے کہ دفاتر میں کوئی شخص اپنے کسی ساتھی کے ساتھ تضحیک آمیز رویہ اختیار کرتا ہے اور اس کے ساتھ منظم طریقے سے بُرا سلوک کرتا ہے، ایسے لوگ ایک سے زیادہ بھی ہوسکتے ہیں۔

اکثر دفاتر میں اس طرح کے بدمعاش ہوتے ہیں جنہیں انگریزی میں آفس بُلی (office bully) کہتے ہیں، ان افراد کا سب سے بڑا ہتھیار ڈر اور خوف کا ماحول پیدا کرنا ہوتا ہے۔ یہ مسلسل اپنے ساتھیوں کی تذلیل کرکے، ان کے کام پر بے جا انگلیاں اٹھا کر، ان کو اپنے زیر اثر رکھنا چاہتے ہیں۔

دفتری بدمعاش اس طرح کا منفی ماحول بنا دیتے ہیں جس سے ان کے ارد گرد موجود افراد کا نہ صرف کام متاثر ہوتا ہے بلکہ جن ساتھیوں کو وہ ٹارگٹ کرتے ہیں ان کو ڈپریشن اور دیگر ذہنی امراض تک میں مبتلا کرسکتے ہیں۔

ایسا شخص دفتر میں اس قسم کے جارحانہ رویے سے ایسا منفی ماحول پیدا کردیتا ہے جس کی وجہ سے ادارے کی پیداواری صلاحیت میں کمی جبکہ تناؤ اور اضطراب میں اضافہ ہوجاتا ہے۔

یہ ایک سنگین مسئلہ ہے جس کے تدارک اور اسے حل کرنے کے لیے دفتر کے مختلف شعبہ جات کے ذمہ داران کو اس شخص کیخلاف مؤثر کارروائی کی ضرورت ہوتی ہے۔

 دفتری بدمعاش کئی طریقوں سے خوف کا ماحول بنا سکتا ہے :

1 ۔ گفتگو میں بدسلوکی : ایسا شخص اپنے ساتھیوں کو حقیر سمجھتے ہوئے توہین آمیز رویہ اور ان کی تذلیل کرسکتا ہے۔

2۔ ڈرانا : ساتھیوں کو ڈرانے کیلئے اپنے جارحانہ رویے اور جسمانی حرکات کا استعمال کرسکتا ہے۔

3۔ افواہیں پھیلانا : ایسا شخص دفتر میں ساتھیوں (کولیگز) کی ساکھ کو نقصان پہچانے کی غرض سے غلط معلومات یا ان کیخلاف بدنیتی پر مبنی افواہیں پھیلا سکتا ہے۔

4۔ سرگرمیوں سے دوری : دفتری بدمعاش کی کوشش ہوتی ہے کہ وہ کسی بھی ساتھی (کولیگ) کو اہم ملاقاتوں، منصوبوں یا سماجی تقریبات سے الگ تھلگ رکھے۔

5۔ مائیکرو مینیجنگ : دفتر کے ساتھیوں کے کام پر مسلسل تنقید اور ان کے کام کی منفی انداز میں سخت نگرانی کرنا اور انہیں بار بار نااہلی کا احساس دلانا۔

6۔ انتقامی کارروائی : دفتری بدمعاش کی کوشش ہوتی ہے کہ وہ ایسے کولیگز کو سزا دے یا جرمانہ عائد کرے جو اس کے غنڈہ گردی کے رویے کی شکایت متعلقہ بڑے افسران سے کرتے ہیں۔

7۔ ہیرا پھیری : دفتری بدمعاش کولیگز پر نفسیاتی حربوں کا استعمال کرتے ہوئے ان سے ہیرا پھیری کرتا ہے تاکہ انہیں اپنی سوچ، تصورات پر قائل کرسکے۔

8۔ طرف داری یا اقربا پروری : ایسا شخص بعض من پسند ساتھیوں کے ساتھ ترجیحی سلوک کرتا ہے، ان کی طرف داری کرکے دوسرے کولیگز کو ناراض اور ان میں خوف کی فضا پیدا کرتا ہے۔

9۔ عوامی تذلیل : دفتری بدمعاش دوسرے لوگوں کے سامنے اپنے کولیگز پر تنقید کرکے انہیں شرمندہ اور رسوا کرتا ہے جس سے ان کی عزت نفس مجروح اور ان کی خود اعتمادی کو بھی نقصان پہنچتا ہے۔

10۔ دھمکیاں : اس کی کوشش ہوتی ہے کہ اگر کولیگز اس کی کوئی بات نہیں مانتے تو وہ انہیں ملازمت سے نکلوانے ان کی ترقی میں روڑے اٹکانے یا دیگر سنگین نتائج کی دھمکیاں دیتا ہے۔

یاد رکھیں! دفتر میں اس قسم کی صورتحال سے نمٹنے کے لیے اور ہر ایک کے لیے ایک محفوظ اور باعزت روزگار کی جگہ بنانے کے لیے مضبوط لیکن ہمدردانہ انداز کی ضرورت ہوتی ہے۔

اپنے دفتری ساتھیوں کے ساتھ معتدل رویہ رکھیں بہت زیادہ دوستانہ یا حاکمانہ رویہ بھی آپ کیلئے مشکلات کا سبب بن سکتا ہے۔