حج کے سفر میں کون سا سامان لے جانا ضروری ہے؟

پاکستان سے حجاج سعودی عرب پہنچنا شروع ہوگئے ہیں اور متعدد پروازوں کے تحت عازمین حجاج کی روانگی کا سلسلہ جاری ہے۔

حجاج کی سعودی عرب روانگی سے قبل پاکستان کے مختلف شہروں میں قائم حاجی کیمپوں میں زائرین کو تربیت بھی دی جا رہی ہے جس میں حج کے فرائض کی ادائیگیوں، سفر کے دوران ضروری اقدامات اور اشیاء کی فہرست بھی فراہم کی گئی ہے۔

اس حوالے سے اے آر وائی ڈیجیٹل کے پروگرام گڈ مارننگ پاکستان میں مسز امتیاز جاوید نے حج پر جانے والے عازمین کو بہت اہم معلومات اور مشورے دیئے۔

انہوں نے بتایا کہ حج کے سفر میں کم سے کم سامان ساتھ لے کر جانا چاہیے جو باآسانی ساتھ رکھا جاسکے۔

مسز امتیاز جاوید نے کہا کہ حجاج سفری دستاویزات کے لیے اپنے ساتھ علیحدہ ایک چھوٹا بیگ رکھیں، اس کے علاوہ احرام کے دو جوڑے بھی رکھیں اور ویسے پہننے کے لیے کپڑوں کے چار جوڑے ساتھ لے کر جائیں۔

اس کے ساتھ ساتھ چھوٹی چھوٹی چیزیں جن کی گھر میں بھی ضرورت پڑتی ہے مثلاً سوئی دھاگا، کنگھی، ازار بند دانی، مسواک، عطر کی چھوٹی شیشی، خصوصی دعاؤں کے کارڈ بھی ساتھ رکھیں۔

اس کے علاوہ ادویات بھی ساتھ لے کر جائیں جس میں اینٹی الرجی، درد کی گولیاں، او آر ایس کے ساشے، اور زخم پر لگانے والی کوئی سی بھی کریم اپنے بیگ میں رکھیں۔ اس کے ساتھ چھتری، جوتے اور پانی کی بوتل ساتھ لازمی رکھیں تاکہ ڈی ہائیڈریشن کا شکار نہ ہوں۔