آئی ٹی سیکٹر کے حوالے سے بڑی خبر

اسلام آباد: نئے مالی سال کے بجٹ میں آئی ٹی سیکٹر کے لیے 357 فی صد تک اضافے کی تجویز دی گئی ہے۔

تفصیلات کے مطابق ترقیاتی بجٹ میں وزارت آئی ٹی کے لیے 27 ارب 43 کروڑ 50 لاکھ مختص کرنے کی تجویز ہے، اور انفارمیشن ٹیکنالوجی کے 15 نئے منصوبے شروع کرنے کا فیصلہ کیا گیا ہے۔

ذرائع کے مطابق 15 نئے منصوبوں کے لیے 6 ارب 28 کروڑ 50 لاکھ روپے مختص کیے جانے کی توقع ہے، جب کہ پہلے سے جاری 15 منصوبوں کے لیے 21 ارب 15 کروڑ روپے رکھنے کی تجویز ہے۔

ڈیجیٹل اکانومی کے فروغ کے منصوبے کے لیے 3 ارب 50 کروڑ، آئی ٹی انڈسٹری میں جدت لانے کے لیے ایک ارب روپے، قومی اسمبلی ڈیجیٹلائزیشن، انفرا اسٹرکچر منصوبوں کے لیے 5،5 کروڑ، وزارتوں کے ڈیپارٹمنٹس میں اسمارٹ آفس منصوبے کے لیے 30 کروڑ مختص کرنے کی تجویز دی گئی ہے۔

اسلام آباد ٹیکنالوجی ڈیولپمنٹ پارک منصوبے کے لیے 9 ارب 92 کروڑ 57 لاکھ روپے، کراچی میں آئی ٹی پارک کے قیام کے لیے 6 ارب 78 کروڑ 92 لاکھ روپے، اور سائبر سیکیورٹی فار ڈیجیٹل پاکستان منصوبے کے لیے ایک ارب روپے کا بجٹ رکھنے کی توقع ہے۔