ہربھجن سنگھ ’دوغلے‘ اور ’گھٹیا انسان‘ قرار

قومی ٹیم کے سابق فاسٹ بولر تنویر احمد نے سابق بھارتی کرکٹر ہربھجن سنگھ کو پاکستان کے خلاف زہر اگلنے پر دوغلا اور گھٹیا انسان قرار دے دیا۔

سماجی رابطے کی ویب سائٹ ’ایکس‘ پر تنویر احمد نے ہربھجن سنگھ کو کرارا جواب دیتے ہوئے لکھا کہ ’دوغلے انسان اگر تم بولتے ہو بھارت کو پاکستان نہیں جانا چاہیے تو پھر گھٹیا انسان تم پاکستانی کھلاڑیوں سے ملتے کیوں ہو۔

تنویر احمد نے مزید لکھا کہ ’ہمیں بھی پتا ہے گھٹیا انسان تمہارے ملک میں کیا ہوتا ہے۔‘

واضح رہے کہ گزشتہ روز سابق بھارتی اسپنر ہربھجن سنگھ نے چیمپئنز ٹرافی 2025 کے لیے ٹیم پاکستان بھیجنے کی مخالفت کی تھی۔

سابق اسپنر ہربھجن سنگھ نے سوال کیا تھا کہ بھارتی ٹیم پاکستان کیوں جائے آپ مجھے جواب دے دیں، وہاں کھلاڑیوں کی حفاظت کے معاملے پر تشویش ہے۔

ہربھجن نے ہرزہ سرائی کرتے ہوئے کہا تھا کہ وہاں خود ان کے حالات ایسے ہیں کہ آئے دن کچھ نہ کچھ واردات ہوتی ہے، مجھے نہیں لگتا کہ پاکستان جانا محفوظ ہے۔

سابق کرکٹر نے کہا تھا کہ بی سی سی آئی کا اقدام بالکل صحیح ہے، میں اس کو سپورٹ کرتا ہوں اور کھلاڑیوں کی حفاظت سے بڑھ کر کچھ نہیں ہے۔