محمد شامی سے شادی کی افواہیں: ثانیہ مرزا کے والد بول پڑے

بھارت کی سابق ٹینس اسٹار ثانیہ مرزا کے والد عمران مرزا نے بیٹی کی کرکٹر محمد شامی سے دوسری شادی کی افواہوں پر سخت ردعمل دیا ہے۔

بھارتی میڈیا نے حال ہی میں دعویٰ کیا تھا کہ ثانیہ مرزا اور فاسٹ بولر محمد شامی جلد شادی کرنے والے ہیں، یہ سب اس وقت شروع ہوا جب سوشل میڈیا پر کسی نے ثانیہ کے ہمراہ شامی کی ایڈٹ شدہ تصاویر لگائیں، ان فوٹو شاپ ہوئی تصویروں میں شامی کو دلہا کے روپ میں دکھایا گیا تھا۔

بھارتی رپورٹس میں دعویٰ کیا گیا تھا کہ شامی اور ثانیہ اگست میں شادی کرنے والے ہیں تاہم دونوں کی جانب سے ان افواہوں پر ردعمل نہیں دیا گیا جب کہ اب  ثانیہ مرزا کے والد نے  ان افواہوں پر سخت ردعمل کا اظہار کیا ہے۔

بھارتی میڈیا سے بات کرتے ہوئے عمران مرزا نے واضح کیا کہ یہ سب بکواس ہے، ثانیہ  کی تو کبھی محمد شامی سے ملاقات تک نہیں ہوئی۔

واضح رہے کہ ثانیہ مرزا پاکستانی کرکٹر شعیب ملک کی سابقہ اہلیہ ہیں، دونوں کا ایک بیٹا اذہان مرزا ملک بھی ہے جو کہ اپنی والدہ کے ساتھ رہتا ہے، شعیب ملک نے حال ہی میں پاکستانی اداکارہ ثنا جاوید سے شادی کی ہے۔