روبوٹس کو انسانی جِلد سے مزین کرنے کی حیرت انگیز کوشش

جاپانی سائنسدان روبوٹس کے لیے انسانی جِلد تیار کرنے کی کوششوں میں مصروف عمل ہیں، اس سلسلے میں انسانی جِلد کے خلیات کو  لے کر تجربات کیے جارہے ہیں۔

اس حوالے سے ٹوکیو یونیورسٹی کے ماہرین نے لیبارٹری میں تیار کی گئی انسانی جلد سے مشابہت رکھنے والا روبوٹک چہرہ بنایا ہے۔

غیرملکی خبر رساں ادارے کی رپورٹ کے مطابق جرنل سیل رپورٹس فزیکل سائنس میں شائع ایک تحقیق کے حوالے سے بتایا گیا ہے کہ روبوٹس پر انسانوں جیسی حقیقی جِلد استعمال کرنے کی کوشش کی جارہی ہے۔

ماہرین کے تیار کردہ روبوٹس انسانوں جیسے تو نظر نہیں آتے لیکن سائنسدانوں کے مطابق انہوں نے حقیقی نظر آنے والے روبوٹس کی تیاری میں بڑی پیشرفت کی ہے۔

مذکورہ تحقیق کا مقصد روبوٹس کے چہروں پر انسانوں جیسی مسکراہٹ اور تاثرات کو اجاگر کرنا ہے۔ محققین کے مطابق یہ ایسے روبوٹس ہوں گے جن کی جِلد خودکار طریقے سے اپنی مرمت کرنے کی صلاحیت بھی رکھتی ہوگی۔

سائنسدانوں کا کہنا ہے کہ لیبارٹری میں انسانی جلد کے زندہ خلیات کو استعمال کرکے مصنوعی جِلد تیار کی گئی ہے جو نہ صرف بہت زیادہ نرم ہے جس کے ذریعے جِلد کی قدرتی لچک کو برقرار رکھا جاسکتا ہے۔

تاہم مذکورہ ٹیکنالوجی کو حقیقی شکل دینے میں مزید چند سال کا عرصہ درکار ہے کیونکہ فی الحال روبوٹس کے چہروں پر انسانی تاثرات ظاہر کرنا بہت مشکل ترین مرحلہ ہے لیکن اس تحقیقی کام کو پلاسٹک سرجری اور دیگر مقاصد کے لیے استعمال کیا جاسکے گا۔