ویمنز ٹی20 ورلڈکپ: قومی خواتین ٹیم کا فاتحانہ آغاز

شارجہ: ویمنز ٹی 20 ورلڈکپ میں قومی خواتین ٹیم نے فتح کے ساتھ کھاتہ کھول لیا، کم اسکور کے باوجود سری لنکا کو شکست دیدی۔

تفصیلات کے مطابق 117 رنز کے ہدف کے تعاقب میں سری لنکا کی ٹیم 85 رنز ہی بناسکی، پاکستان ویمنز ٹیم نے سری لنکن ویمنز ٹیم کو لو اسکورنگ میچ میں 31 رنز کے مارجن سے شکست دے دی۔

شکست خوردہ ٹیم کی طرف سے نیلکشیکا سلوا 22 اور وشمی 20 رنز بناکر نمایاں رہیں جبکہ آئی لینڈرز کی 9 خواتین پلیئرز ڈبل فگر میں بھی داخل نہ ہوسکیں۔

پاکستان کی طرف سے سعدیہ اقبال نے 3 کھلاڑیوں کو آؤٹ کیا، فاطمہ ثنا، عمائمہ سہیل اور نشرح سندھو نے 2،2 وکٹیں حاصل کیں، آل راؤنڈ پرفارمنس پر کپتان فاطمہ ثنا کو پلیئر آف دی میچ قرار دیا گیا۔

اس سے قبل قومی ویمنز ٹیم پہلے بیٹنگ کرتے ہوئے 116 رنز پرآل آؤٹ ہوگئی، کپتان فاطمہ ثنا نے 30، نداڈار نے 23 رنز اسکور کیے۔

عمائمہ سہیل نے 18 اور سدرہ امین نے 12 رنز بنائے، سری لنکا کی جانب سے چماری اتھاپتھو، اودیشیکا اور سوگنڈیکا نے 3،3 وکٹیں حاصل کیں۔