وی پی این کی رجسٹریشن سے متعلق پی ٹی اے کا اہم اعلان

اسلام آباد: پاکستان ٹیلی کمیونیکیشن اتھارٹی نے کہا ہے کہ اداروں اور فری لانسرز کیلئے وی پی این کی رجسٹریشن مزید آسان کردی ہے۔

تفصیلات کے مطابق پاکستان میں وی پی این (ورچوئل پرائیوٹ نیٹ ورک) کی رجسٹریشن کے حوالے سے پاکستان ٹیلی کمیونیکیشن اتھارٹی کا کہنا ہے کہ سافٹ ویئر ہاؤسز، کال سینٹرز اور بینک پی ٹی اے کی ویب سائٹ پر اس سلسلے میں رجسٹریشن کراسکتے ہیں۔

پی ٹی اے نے کہا کہ سفارتخانے، فری لانسرز ویب سائٹ پر وی پی اینز باآسانی رجسٹرڈ کرسکتے ہیں، سافٹ ویئرایکسپورٹ بورڈ کے ممبران بھی سہولت سے فائدہ اٹھا سکتے ہیں۔

رجسٹریشن کیلئے آن لائن فارم مکمل کرنا، بنیادی تفصیلات فراہم کرنا ضروری ہے، فری لانسرز کو اپنے پروجیکٹ یا کمپنی سے وابستگی کی تصدیق فراہم کرنا ہوگی، درخواست دہندگان کو وی پی این کنیکٹیوٹی کیلئے آئی پی ایڈریس بھی فراہم کرنا ہوگا۔

پی ٹی اے کا مزید کہنا تھا کہ وی پی این رجسٹریشن کے عمل کے کوئی چارجز نہیں ہیں، اب تک 20 ہزار سے زائد کمپنیاں، فری لانسرز وی پی اینز رجسٹر کراچکے ہیں۔