ملتان دوسرا ٹیسٹ: ویسٹ انڈیز نے پاکستان کو شکست دے کر سیریز برابر کر دی

ملتان میں کھیلے جا رہے ٹیسٹ میچ میں ویسٹ انڈیز نے پاکستان کو 120 رنز سے شکست دے کر دو ٹیسٹ میچوں کی سیریز ایک، ایک سے برابر کر دی۔

اے آر وائی نیوز کے مطابق پاکستان اور ویسٹ انڈیز کے درمیان دو ٹیسٹ میچوں کی سیریز کے ملتان میں کھیلے جا رہے دوسرے اور آخری ٹیسٹ میچ کا نتیجہ چوتھے دن ہی میزبان ٹیم کی شکست کی صورت میں برآمد ہوگیا۔ ویسٹ انڈیز نے قومی ٹیم کو 120 رنز سے با آسانی شکست دے کر سیریز ایک، ایک سے برابر کر دی۔

آج چوتھے دن کا میچ شروع ہوا تو پاکستان کو جیت کے لیے 178 رنز اور ویسٹ انڈیز کو صرف 6 وکٹیں درکار تھیں۔ لیکن پاکستانی بیٹرز نے فلاپ شو پیش کیا اور 6 کھلاڑی کل کے مجموعے میں صرف 58 رنز کا اضافہ کر کے پویلین لوٹ گئے۔ یوں میچ کا نتیجہ پہلے سیشن کے ابتدائی سوا گھنٹے میں ہی برآمد ہوگیا۔

دوسرے میچ میں بابر اعظ، نہ شان مسعود، محمد رضوان نہ سلمان علی آغا اور نہ ہی سعود شکیل کوئی بڑا نام بڑا اسکور نہ کر سکا۔ ٹاپ اسکور بابر اعظم (31) رنز کے ساتھ رہے۔ محمد رضوان (25)، کامران غلام (19)، سلمان آغا (15) اور سعود شکیل (13) ڈبل فیگرز میں داخل ہونے والے دیگر کھلاڑی تھے۔

ویسٹ انڈیز کی جانب سے جومل واریکن نے پانچ، کیون سنکلیئر نے تین جب کہ گوڈاکیش موتی نے دو کھلاڑیوں کو آؤٹ کیا۔

جومل کو میچ میں مجموعی طور پر 9 وکٹیں حاصل کر کے میچ جب کہ جب کہ سیریز میں 19 وکٹیں اور 85 رنز بنانے کی آل راؤنڈ کارکردگی پر سیریز کا بہترین کھلاڑی کے اعزازات سے نوازا گیا۔

اس سے قبل ویسٹ انڈیز کی ٹیم دوسری اننگ میں 244 رنز بنا کر آؤٹ ہوگئی تھی اور پاکستان کو جیت کے لیے 254 رنز کا ہدف دیا تھا۔

میچ میں ویسٹ انڈیز نے ٹاس جیت کر پہلے بیٹنگ کا فیصلہ کیا تھا۔ پاکستانی بولرز نے 163 رنز پر پوری مہمان ٹیم کو ڈھیر کر دیا تھا لیکن پاکستانی بلے بازوں نے ان کی محنت پر پانی پھیر دیا تھا اور 154 رنز پر پوری ٹیم آؤٹ ہوگئی تھی۔

اس میچ میں پاکستان کے نعمان علی نے دوسری بار ایک میچ میں دس وکٹیں لینے کا کارنامہ بھی انجام دیا۔

پاکستان نے پہلے میچ میں ویسٹ انڈیز کو ہرایا تھا۔ دوسرے میچ میں مہمان ٹیم نے حساب برابر کر کے دو ٹیسٹ میچوں کی سیریز کو بھی برابر کر دیا۔