ماہ رمضان میں کس وقت کون سی ورزش کرنی چاہیے

ماہ رمضان میں ورزش کے حوالے سے لوگوں کے ذہن میں بے شمار سوالات آتے ہیں کہ روزہ رکھنے کے بعد ورزش کی جائے یا نہیں اگر کرنی ہو تو کون ساوقت بہتر ہوسکتا ہے؟

اے آر وائی نیوز کے پروگرام باخبر سویرا میں باڈی بلڈنگ چیمپئن اور فٹنس ٹرینر رمیض ابراہیم خان نے ماہ رمضان میں معمول اور فٹنس کے حوالے سے کچھ اہم باتیں بتائیں۔

انہوں نے بتایا کہ روزہ رکھ کر ورزش کرنا مکمل طور پر محفوظ ہے، لوگوں کو رمضان میں بھی ورزش کے سلسلے کو جاری رکھنا چاہیے کیوں کہ یہ جسم کو پُھرتیلا اور توانا رکھتی ہے۔

رمیض ابراہیم خان نے کہا کہ بہت سے افراد رمضان میں ورزش کرنے کے اوقات کے حوالے سے تذبذب کا شکار ہوتے ہیں اس لیے میرا کہنا یہ ہے کہ اگر آپ موٹاپے چھٹکارا چاہتے ہیں یا اپنی صحت مزید بہتر کرنی ہو تو نماز عصر سے مغرب کے درمیان ورزش کرنا بے حد مفید ہے۔

ان کا کہنا تھا کہ اگر آپ روزے کے حالت میں صبح ہی ورزش کرلیں گے تو یہ آپ کی صحت کے لیے ایک اچھا فیصلہ ثابت نہیں ہو گا، کیوں کہ صبح ورزش کرنے کے بعد آپ کے جسم میں پورا دن گزارنے کے لیے توانائی باقی نہیں رہے گی۔

انہوں نے بتایا کہ جو لوگ عصر سے مغرب تک ورزش نہیں کرپاتے ان کیلئے تراویح کے بعد کا وقت بہت مناسب ہے، اس سے ایک گھنٹہ پہلے تھوڑا بہت کچھ کھا بھی سکتے ہیں۔