جاوید اختر نے کنگنا کی ناقابل ضمانت وارنٹ گرفتاری کے لیے درخواست دیدی

بالی ووڈ کے معروف نغمہ نگار جاوید اختر نے رکن پارلیمنٹ و اداکارہ کنگنا رناوت کے ناقابل ضمانت وارنٹ گرفتاری جاری کرنے کی درخواست عدالت میں جمع کروا دی۔

بھارتی میڈیا رپورٹ کے مطابق جاوید اختر اور کنگنا رناوت کے درمیان قانونی جنگ شدت اخیتار کرگئی، بھارتی کے معروف شاعر نے سماعت میں غیر حاضر ہونے پر ناقابل ضمانت وارنٹ گرفتاری کی استدعا کردی ہے۔

بھارتی میڈیا رپورٹ کے مطابق ہتک عزت کیس میں معروف موسیقار جاوید اختر کی جانب سے ہتک عزت کیس عدالت میں دائر کیا گیا تھا۔

جاوید اختر کی جانب سے دائر درخواست میں موقف اختیار کیا گیا ہے کہ کنگنا رناوت اوچھے ہتھکنڈے اپناتے ہوئے کیس کے فیصلے کو تاخیر میں ڈال رہی ہیں۔

کنگنا رناوت کو گزشتہ ہفتے عدالت میں پیش ہونا تھا لیکن وہ سماعت میں حاضر نہیں ہوئیں، جس پر جاوید اختر کے وکیل نے عدالت میں درخواست جمع کروائی ہے کہ کنگنا رناوت کے ناقابل ضمانت وارنٹ گرفتاری جاری کئے جائیں۔

اداکارہ نے عدالت میں حاضری سے مستقل استثنیٰ کی درخواست کی تھی جسے مسترد کر دیا گیا تھا۔

واضح رہے جاوید اختر کی جانب سے نومبر 2020 میں اندھیری کورٹ میں درخواست دائر کی گئی تھی، جس میں اداکارہ پر ٹی وی پر عزت مجروح کرنے کا الزام عائد کیا گیا تھا۔