بچے کے پیٹ میں 56 دھاتی اشیاء کی موجودگی، سرجن بھی پریشان

بھارت میں ایک کم عمر طالب علم کے پیٹ سے 56 اقسام کی دھاتی اشیاء برآمد ہونے پر ڈاکٹرز بھی حیران رہ گئے، تاہم آپریشن کے بعد بچہ جانبر نہ ہوسکا۔

تفصیلات کے مطابق بھارتی ریاست اترپردیش کے ضلع ہاتھرس میں ایک حیران کن واقعہ پیش آیا ہے، نویں جماعت کے 15 سالہ طالب علم آدتیہ کو کافی عرصے سے پیٹ میں درد اور سانس لینے میں پریشانی کی شکایت تھی۔

جب بچے کے پیٹ کا بار بار الٹراساؤنڈ کرایا گیا تو دیکھنے والے دانتوں میں انگلیاں دبا کر رہ گئے، کیونکہ بچے کے پیٹ میں دھات کی 56 اشیاء جس میں گھڑی کے چھوٹے سیل، بلیڈ کے ٹکڑے اور کیل وغیرہ ملیں۔

ڈاکٹرز نے بچے کا فوری طور پر آپریشن کرنے کا فیصلہ کیا اور 27 اکتوبر کو آپریشن ہوا لیکن جب تک بہت دیر ہوچکی تھی۔

ساری چیزیں نکال کر اس کا پیٹ بالکل صاف کر دیا گیا۔ اس کے بعد اگلے ہی دن 28 اکتوبر کی رات علاج کے دوران اس کی موت ہوگئی۔ آدتیہ کے گلے کا الٹرا ساؤنڈ بھی کیا گیا لیکن گردن میں زخم کے کوئی نشانات نہیں ملے۔

آدتیہ کے والد نے بتایا کہ ان کا بیٹا سرجری کے ایک دن بعد ہی چل بسا کیونکہ اس کے دل کی دھڑکن بڑھ گئی تھی اور اس کا بلڈ پریشر خطرناک حد تک گر گیا تھا۔

مزید حیران کن بات یہ کہ یہ تمام اشیاء بچے کے پیٹ میں کیسے گئیں؟ کیونکہ غذا کی نالی کے اندر نہ تو کوئی زخم ہے اور نہ اس اتنی گنجائش کہ یہ چیزیں باآسانی وہاں سے گزر کر معدے میں جاسکیں۔