مغلیہ دور کا نایاب زیور نیتا امبانی کے پاس کیسے پہنچا؟

مکیش امبانی اس وقت نہ صرف دنیا کی چند امیرترین شخصیات میں سے ایک ہیں بلکہ انکا اور اہلخانہ کا زندگی گزارنے کا طریقہ بھی شاہانہ ہے۔

اب مغلیہ دور کی یاد تازہ کرتے ہوئے مکیش امبانی کی اہلیہ نیتا امبانی نے بھارت میں منعقدہ مقابلۂ حسن میں مغل بادشاہ شاہ جہاں کا بازو بند پہنا۔ ماضی کا یہ نایاب زیور اپنے بازو کی زینت بنا کر انھوں نے سب کی توجہ اپنی جانب مبذول کروائی۔

بھارت میں 28 سال بعد مس ورلڈ کی تقریب مکیش امبانی کی ملکیت جیو ورلڈ کنوینشن سینٹر میں منعقد ہوئی تھی جہاں دنیا بھر کی حسیناؤں نے اپنے جلوے بکھیرے۔ یونان سے تعلق رکھنے والی حسینہ ارینے اسکلائیوا کو فاتح حسینہ کا تاج پہنایا گیا۔

اس تقریب کی خاص بات یہ تھی کہ ریلائنس فاؤنڈیشن کی چئیر پرسن نیتا امبانی نے بھی اس پروگرام میں شرکت کی، انھوں نے اپنی کالی ساڑھی کے ساتھ بازو بند پہنا ہوا تھا جو کہ مغل بادشاہ شاہ جہاں کی کلغی ہے۔

بھارتی میڈیا کے مطابق نیتا نے 71 ویں مس ورلڈ فائنلز کی تقریب میں مرزا شہاب الدین محمد خرم المعروف شاہ جہاں کی کلغی کو بطور بازوبند زیب تن کیا ہوا تھا۔

مغلیہ دور کی معروف شاہ جہاں کی اس کلغی میں ہیرے، یاقوت اور سپینلز جڑے ہوئے ہیں جبکہ اس کی لمبائی 13.7 سینٹی میٹر ہے اور چوڑائی 19.8 سینٹی میٹر ہے۔ بھارتی میڈیا کے مطابق کلغی کی قیمت 2 ارب بھارتی روپے ہے جو پاکستانی روپے میں تقریباً 6 ارب روپے بنتی ہے۔

قیمتی زیور کو 2019 میں بھی آل تھائی کلیکشن میں دیکھا گیا تھا جہاں یہ کلغی نیلامی کیلئے پیش کی گئی تھی، امکان ہے کہ امبانی فیملی نے یہ نایاب زیور وقت خریدا تھا۔

قابل ذکر بات یہ ہے کہ نیتا امبانی کو بھی اس پروگرام میں ایوارڈ پیش کیا گیا، انھیں ’بیوٹی ود پرپز ہیومنٹیرین ایوارڈ‘ سے نوازا گیا۔