کینیڈا میں اسکالر شپ کے خواہشمند طلبہ کیلیے خوشخبری

کینیڈا میں تعلیم حاصل کرنے والے طلبہ و طالبات کیلئے اسکالر شپ کے حوالے سے بڑی خبر آگئی، اس سال کلوورڈیل روڈیو یوتھ انیشیٹو فاؤنڈیشن نے اپنے اسکالر شپ ایوارڈز میں 5ہزار ڈالر کا اضافہ کیا ہے۔

غیر ملکی خبر رساں ادارے کی رپورٹ کے مطابق کلورڈیل روڈیو یوتھ انیشیٹو فاؤنڈیشن نے اس سال مقامی طلباء کو پوسٹ سیکنڈری اداروں میں تعلیم حاصل کرنے کے لیے 15ہزار ڈالر کے اسکالر شپس دیے ہیں۔

اس حوالے سے فاؤنڈیشن کی اسکالرشپ کمیٹی کے چیئرمین رک ہیوگ نے میڈیا سے گفتگو میں کہا کہ اس سال ہم نے مالی امداد کی تقسیم میں ایک نئی مثال قائم کی ہے۔

ہیوگ نے کہا کہ وہ ہر سال درخواست دہندگان کے معیار سے متاثر ہوتے ہیں جو فاؤنڈیشن کے اسکالر شپ ایوارڈز جیتنا چاہتے ہیں۔

ان کا کہنا تھا کہ ہم اپنے آغاز سے ہی درخواستوں کے اعلیٰ معیار سے حیران ہیں، ہیوگ نے کہا کہ ان نوجوانوں کی خصوصیات کو دیکھ کر میں اپنی کمیونٹی کے مستقبل کے بارے میں پرامید رہتا ہوں۔

انہوں نے بتایا کہ فاؤنڈیشن نے گزشتہ ایک دہائی سے اسکالر شپ گرانٹس دینا شروع کیے ہیں، جس کا قیام 2014میں 68 ویں کلورڈیل روڈیو اور کنٹری فیئر میں ہوا تھا۔

اس وقت سے لے کر اب تک فاؤنڈیشن نے تقریباً 80ہزار ڈالر کے اسکالر شپس اور نوجوانوں کی مدد کے پروگراموں کے لیے فنڈز فراہم کیے ہیں۔ جیسے جیسے عطیات اور فنڈ ریزنگ میں اضافہ ہوتا ہے ویسے ویسے اسکالر شپ کی رقم بھی بڑھتی رہتی ہے۔

ہیوگ نے مزید کہا کہ سال 2024 میں ایک نیا اسکالر شپ "گیری اینڈ گیل گرِیلش فاؤنڈیشن اسکالرشپ” ہے، جو اس سال پہلی بار اریانہ ہاشے کو دی گئی۔ یہ ایوارڈ طلباء کے لیے بنایا گیا ہے جنہیں تعلیمی مشکلات کا سامنا رہا ہو۔