حفاظت پر مامور اہلکار نے بابا صدیقی کو بچانے کی کوشش نہیں کی، پولیس کا انکشاف

ممبئی پولیس کی تفتیش میں انکشاف سامنے آیا ہے کہ حفاظت پر مامور اہلکار نے این سی پی لیڈر بابا صدیقی کو بچانے کی کوشش نہیں کی۔

پولیس نے قتل کے وقت بابا صدیقی کی حفاظت پر مامور کانسٹیبل شیام سوناونے کو فوری طور پر معطل کردیا ہے، حکام نے بتایا کہ شیام نے ملزمان کو روکنے یا بابا صدیقی کو بچانے کی کوئی کوشش نہیں کی جبکہ معاملے کی مزید تحقیقات کی جارہی ہیں۔

پولیس نے مجموعی طور پر اب تک 9 افراد کو گرفتار کیا ہے، ممبئی پولیس کی کرائم برانچ نے پانچ مزید ملزمان کو گرفتار کیا ہے، جو پنويل اور رائے گڑھ سے پکڑے گئے ہیں جبکہ اس سے قبل چار افراد کو گرفتار کیا گیا تھا۔

کرائم برانچ کے مطابق ان تمام ملزمان کا تعلق لارنس بشنوئی گینگ سے ہے اور ان پر بابا صدیقی کے قتل میں ملوث ہونے کا الزام ہے۔

تفتیش کے دوران پولیس کو پتا چلا کہ اس قتل میں آسٹرین گلاک اور ترک ساختہ زگانا پسٹلز کا استعمال کیا گیا تھا، کرائم برانچ نے تین مختلف قسم کے ہتھیاروں کی برآمدگی کی تصدیق کی ہے جن میں ایک لوکل پستول بھی شامل ہے۔

خیال رہے کہ ہفتہ 12 اکتوبر کی رات باندرا کے نرمل نگر میں بابا صدیقی کو ٹارگٹ کرکے قتل کیا گیا تھا جب وہ اپنے بیٹے کے دفتر سے باہر نکل رہے تھے۔

3 ملزمان نے بابا صدیقی کو گولیاں چلائی تھیں انھیں فوری طور پر ممبئی کے لیلاوتی اسپتال منتقل کیا گیا لیکن 66 سالہ مسلمان سیاستدان اور سلمان خان کے دوست جانبر نہ ہو سکے تھے۔